إن الشعر الجميل هو ذلك الشعر الهادف..
الذي يحمل رسالة...
أو يوضح صورة...
أو يأمر بخير...
أو ينهى عن شر...
وهذه من القصائد المشهورة التي تحمل في طياتها صورة جميلة..
وهي احدى قصائد الشاعر المعروف غازي بن عون..
سر يا قلم واكتب على بيض الأوراق ،،،، غرايب من محكمات الصناديق
يختار صاحبهن من الشعر مـــــالاق ،،،، مثل الورود اليانعات المفاتيق
غرايب تدخــل مــزاج أهــل الاذواق ،،،، اللي لجزلات المثايل عشاشيق
مـن خــاطر من غفلته تــو ما فـــاق ،،،، وعاف الزمان اللي يبوق المواثيق
وقتٍ هــذا مـا عادني له بعشـــــاق ،،،، ما ينعشق من يوم فيه العهد بيق
ولا عاد فيه الناس تمشي بميثـــاق ،،،، ولا عاد بين العدل والبطل تفريق
والنـاس صاروا فيه حايز وتفــــاق ،،،، وصـار الضعيف ضحيةٍ للتفافيق
وتحطمت فيه المكــارم والاخــــلاق ،،،، ولاعاد في مكره بالاجواد تبريق
فيه النساء تمشي عرايا بالاسـواق ،،،، والمسلمين يقلــــدون الزنــــاديق
يالله ياللــي نرتجــي منـك الارزاق ،،،، يا كاشف الكربات يا فارج الضيق
يا رافع سبع السمــوات الأطبـــاق ،،،، ومرسي الأراضي بالجبال الشواهيق
يامرسل عيسى والاسباط واسحـاق ،،،، يا منجين عبده من أهل المجانيق
باللي بطشت بقوم صالح هل الناق ،،،، وجعلت يوسف في النبيين صديــق
يامهلك عــدوان موسى بالاغــراق ،،،، وجنود عاد أهلكتهم بالصواعيــق
ياللي جعلت جموع الاحزاب تنعاق ،،،، ومزقتهم عن خاتم الرسل تمـزيق
وجعلت نوره بين الآفــاق شعـــاق ،،،، ياللـــي بعثته رحمة ٍ للمخـــــاليق
الطف بحال اللي عليه الفضا ضــاق ،،،، يسوقه الهاجوس غربٍ وتشريـق
من كثر هم مرهق فكري ارهـــاق ،،،، أفيق منه أحيان واحيان مــافيق
وروابع ٍ تلعب بي أشكال وارنــاق ،،،، حطن لهن بين المعـــاليق أراويق
ما نــام لين إن أول الفجر ينســـاق ،،،، سبة هواجيس ٍ تحش المعــتاليق
ماهوب من زود الطرب ولا الاشواق ،،،، ولا غرام معلقـــات العشــــاريق
طــوق علي الذنب من كـل الافــاق ،،،، ومشاكل سدت علي الطواريــــق
فوقي من الاوزار من غير ماطــاق،،،، أثقل عليه من ذقـانـات وطــــويق
ارجيــك ترحمني ليـاقيـل مـن راق ،،،، لاصرت ما عاد أستطيع أبلع الريق
لا جاء الوعد والتفت الساق بالساق ،،،، وأتلى الكلام الغرغره والتشاهيق
يالله عسانا يوم نشفـات الاريــــاق ،،،، من خلقك اللي من جهنم معـــاتيق
اغفر خطايانا ليــا كشف عن سـاق ،،،، ليــا من خلقك قربو ا للتحـــاقيق
اليا أنــورت وجيه الابرار بشــــراق ،،،، من رحمة المولى وحسن التوافيق
ابهم جنــان الخلد تفرح وتشتـــــاق ،،،، ويسقون فيها من لذيذ المذاويــق
يعطون ما يهوون مع كاس ديهـاق ،،،، ويطوف غلمان عليهم ببــــاريق
وكواعب حــور وقوارير ٍ اتســــاق ،،،، وانهار واثمــــــار عليهم مدانيق
وأهل جهنم سلسلوهم بالأعنــــاق ،،،، والكــل منهم يـم زنزانته سيــق
يجــي لهم فيها تزافير وشهــــاق ،،،، وطوق عليهم من جزا الذنب تطويق
وطعــــامهم فيها حميم وغســــاق ،،،، وشرابهم مهل ٍ يذيب المعــــاليق
وصـــلاة ربي عد مــالاح بـــــراق ،،،، على النبي وعداد نبت الزمـــاليق
ودمتم بود
المفضلات