اعرف وزن نفسي وأوزان الاجناس
ما همني و الله كثيرٍ من الناس
وجودهم مثل العدم في حياتي
ولا همني مقفي و لا همني باس
الله رزقني في عزومي ثباتي
اعرف وزن نفسي وأوزان الاجناس
من كل صنفٍ في جميع الجهاتي
كلِ و له قدره على حسب مقياس
طيبه و من قدري انا لا تحاتي
الطيب بيّن في مداهيل الاحساس
المعتري روح الرجال الثقاتي
و اللي ردي ما ينفعه فلك ترباس
دام الفشق خامل و لا به نجاتي
و كم من جسور(ن) اعدمه رمح جساس
و كم خايبٍ أخطى برمح الزناتي
يا كبر فرق البوم عن طير قرناس
قرناس صف الريش عقب المباتي
اصله وحش ما قد وكر وسط مجلاس
وعمره نقص من سن خمسٍ فواتي
افجح عديدٍ عاتقه لوّيت اقواس
بتّال صيد و منسره له غناتي
عاري نحر لحّاق في ضبته فاس
والقحف بارز فوق سود النواتي
وصّفت انا طيري و طيري على ساس
ينبيك عن ساسه طبوع و صفاتي
لا هو بمنكولٍ و لا هو بمحتاس
اغلب سماته ما تعارض سماتي
ناديت انا طيري و جاوبني الياس
و صوت الشقاوي احتبس في لهاتي
من عام الاول و النظم مشغل الراس
ما ينقطع يا كود وقت الصلاتي
رد مع اقتباس
المفضلات