انا زعلان منك حيل وشايل لك بقلبي عتاب
وأتمنى تحملني مثل ماأتحمل عتابك
ترى بعض الصراحه جرح وثقل ونرفزه وأعصاب
أبي تسمع كلامي زين وتمسك زين أعصابك
تعاهدنا انا وأنته أن نكون أحباب
واحبابك هم احبابي واحبابي هم احبابك
وش الي غيرك فجأه بدون أسباب
انا بسمع كلامك زين وبسمع زين أسبابك
رغم كل الخطأ منك بوجهك ماقفلت الباب
ويوم أخطيت في حقك قفلت بوجهي أبوابك
رخصت الغالي لعيونك حنيت لخاطرك أرقاب
رضيت احنيها أرقابي ولا تحنيها أرقابك
كفايه تمنحني هم وخل من ذم فيني وعاب
ترى من عاب في غيرك ولو طال الزمن عابك
ولا تفكر في يوم أنساك أو يشغلني عنك غياب
انا أتنفسك أهواك وفيك أموت وأحيابك
أنا ماشوف أحد غيرك جميل بفتنته جذاب
انا أعجابي فيك أعمى يفوق اعجاب اعجابك
انا مهما قسى قلبي بكلمه منك أحسه ذاب
انا من زود عشقي لك عشقت العطر في ثيابك
انا ياليت مغرم فيك انا كلي في غرامك شاب
احسك جزء من روحي ولا أتحمل غيابك
ولا قد طاب لي جرحك ولو جرحي لذاتك طاب
عجزت اقدر اشوف الدمع بل أطراف أهدابك
ولكن كل شي إلا جزاة الصد بالترحاب
أذا صديت ترحابي ترى بصد ترحابك
ولاني مرتضي ذلي ولو كان الهوى غلاب
اذا ماكان ترضى بي حشا لايمكن أرضى بك
ولاني قادر أتحمل عشانك غرست الأنياب
انا كلي غدى مجروح من غرسات أنيابك
تجافيني ولا همك ولا تحسب لي أي حساب
وانا من زود عشقي لك أصونك وأحسب حسابك
الآ ياقسوة الصدمه تجيني منك الأصواب
وانا الي كنت أقول الجرح اذا ما صابني صابك
أمانه قول وش بقيت للعذال والأغراب
أذا هذا معي طبعك أجل وش حال أغرابك
تمرد كان يحلى لك تعيب بطيبتي وتغتاب
ولكني ترى أكبر من اني يوم أغتابك
حقيقه أني أكتشفت انك سخيف بطبعك الكذاب
وأني كنت لك لعبه سخيفه تشبه اللعابك
انا عيبي غبي طيب وظني فيك والله خاب
ولا كنت اتوقع تجافي يوم أصحابك
انا جيتك بطيب الطيب وفيك الطيب أبد مآجاب
أبي تعذرني هالقسوه لأن الطيب ماجابك
رد مع اقتباس.gif)
المفضلات