يامدور الهين ترى الكايد احلى
اسأل مغني كايدات الطروقي
الزين غالي لكن الأزين أغلى
ولكل شراي(ن) بضاعه وسوقي
النو عالي والسما فوقه أعلى
لا فاق علم جاه علم يفوقي
الصعب هلا قلت ياصعب سهلا
دامك تبيني فأنت ياصعب شوقي
احب اعسف المهرة اللي تغلى
واحب أروض كل طرف يموقي
واحب أسافر مع سحاب تعلى
واحب فوق الغيم لمع البروقي
وأحب اساهر بدري الي تجلى
وارسم شعاع الشمس عند الشروقي
يامن على ساير فؤادي تولى
خلك على قلب الكرامه شفوقي
أكرم عزيزن بالعمر ماستذلى
يسوق عمره للمشاريف سوقي
أخترتك من الناس للقلب خلى
ياحيثك مرادي وكيفك وذوقي
مارحت أدور كل زول تحلى
لولاك تسوى ماعطيتك خفوقي
رد مع اقتباس
المفضلات