الحب مثل الحروب ابها خساير عظام !!!
الحب ياجاهلٍ بالحب شوق وغرام
عواطفٍ وسط روحك صار مسكانها
الحب ماهوب كلمة مثل باق الكلام
الحب يسكن قلوب ابعز ريعانها
الحب كم واحدن صابه برمي السهام
الحب كلمة كبيرة باسم عنوانها
الحب كم واحدن ساقه بجر الخطام
كلمة لها وقع بالعالم وبازمانها
الحب ياصل ترا حتى قلوب الحمام
من عشقها بالسما تكفخ بجنحانها
الحب ياناس ماهو دوم برد وسلام
كلمة كثير العرب يعيش نيرانها
الحب لا زاد حده صار عشق وهيام
وتصير نفسك تعيش العمر بجنانها
الحب فالقلب يبنى مثل بني الخيام
الصبر مخطر وكثر الشوق عمدانها
الحب ماهوب سلعة ياعرب تنتسام
الحب كلمة بهيضة دوم باثمانها
الحب فيه الحلال وفيه أيضاً حرام
ونفسك عن اللي محرّم جوّد اعنانها
الحب يزدان بالعفة وبالاحتشام
كالبسمة اللي تزين ابلمعة اسنانها
الحب من دون حشمة ودك انّه عدام
مثل السفينة ليا من طاح ربانها
أو مثل عفرا جميلة لولا عيب السنام
ان كان غليت غلا مارخصت اثمانها
حبٍ على غير مبدا بعد صحوه ينام
وناسه ترا ياعرب سريع نسيانها
وحبٍ على عزّ يبقى دوم في كل عام
ناسه مع الوقت ماتنوي بهجرانها
الحب كلمة لها عشاق دوم انقسام
شتان مابين صاحيها وجربانها
الحب مثل الحروب ابها خساير عظام
وابها غنايم بعد في وسط ميدانها
وقبل انهي القاف انا بختم بقول السلام
سلام ياللي قرا الصفحة بقيفانها
رد مع اقتباس
المفضلات