نويت مرباع الغضي سيد الأحباب
قصدي يزول الجرح زاد التهابه
جيت وبقايا نارهم حول الأطناب
بيت الشعر مطوي وباقي زهابه
أقفت ركايبهم ومني الهدب ذاب
من دمعي يسري والذهل بالأجابه
على غزير الدمع ضميت الأهداب
صديت لين الدمع يكفي سحابه
بعض الوجع يمكن تداويه الأعشاب
وبعض الوجع ياويل منهو سطا به
عشق بدوي لاحب ماهو بكذاب
يوفي ولو جرحه تجدد صوابه
واليوم وصلت بينا مثل الأجناب
ذاك الهوى ياضيعته يا سفا به
باكر أذا جينا لهم مثل الأغراب
من عقب ماكنا الأهل والقرابه
الأمر لله كل شي له أسباب
ولا الهوى وش لي على دق بابه
وشلون قلبي مايجي اليوم منصاب
على الرجم منقوش بعض الكتابه
حتى أثر مشيه مع سهول وهضاب
مر يبين ومر مايندرى به
قلبي من الفرقا صويب ومرتاب
كأنه غدا نصفين من هول مابه
حزني عليه انه تسبب ولا طاب
نظرة طبيبه عجلت في ذهابه
ريح الخزامى والنفل زين الأطياب
يشدني ريح السمر في ثيابه
لاقبل نسيم الليل له خيل وركاب
وله في طلوع الشمس عز ومهاب
عشق بدوي
هذه القصيده لشاعر سعد الخريجي
وغناها صاحب الصوت العذب الفنان خالد عبد الرحمن
المفضلات