سبحان الذي خالق الكون *** بالحق خلق وافي وجايد
اللي منين ما تجيه موزون *** لا مخاصمة لا ركن مايد
كان وين ما قال له كون *** ويزول فاي لوقات رايد
يمضن ايام وسنين وقرون ***وكل شي لله عايد
وين قيصر و وين فرعون *** أصحاب البطر و المكايد
ونمرود بابل و قارون *** وكسرى اللي النار قايد
حوى ملكهم طفر غليون *** وارماه ع العذا و الزبايد
بعد قصور وقلاع وحصون ***وجيوش تحت منهم حشايد
عليهم برم كاس المنون *** وخذهم عزيز الوعايد
عطيب هبشهم هبش بالهون*** قدّام رب ع الكون سايد
للناس وضّحه درب مسنون*** عليه يا ردا كل حايد
الدنيا غرر ما لها لون *** والناس فيها طرايد
ما م الفنا هناك مصيون*** ودروبها افخاخ ومصايد
بها يا تعس كل مفتون *** على الله فيها يزايد
غرّاته بمال وبنون ***ومرابط الخيل النجايد
تغانيم ع العاقل تهون***وعارف العمل هو الفايد
يلقاه وين ما بات مدفون ***تحت الثرَى واللحايد
مواعظ الدهر غادي ودون *** شواهر لقيهن وكايد
مْقابله خلا كان مسكون *** بناس في حدود الرغايد
اللي نجعهم بات ممنون *** إن جاه بالبشارات رايد
خبير كان صالب الجون *** ورا برق داير وقايد
منين قابله وطن مدكون *** امراقّه يديرن لبايد
لاوين الحطب طالق غْصون *** والشيح فيه داير وسايد
ربيع بغو من خجّة العون *** نسفاية الرتاتيع كايد
علي لروقة داير طمون *** متغلظ رقى ع السدايد
فيه غيّنت جرد البطون *** كحيلة غلاظ الرفايد
لفيف حشوها داير دْنون*** زنانيح طوف ورجايد
فريق عرض في لعب وفنون ***نهار عيد في حفل شايد
تجوّك علي بيت ميمون*** من جالو حْموله نضايد
بناقتين مع بنت لبون***زكاتها خلاف الزوايد
بها عز دعّامة الركون*** عصّامة الجروح البدايد
ركاّبه قصير القيون***بو عرف مايح بجايد
رقيق جلد نادر العيون ***مطّرغن كثير الرعايد
الصبر ما هوى فيه مكنون *** سكران من هيول البرايد
وان هفّّه رقيق القرون ***يفوج كيف ريم الحمايد
ينعى بقلّته كي المجنون *** ويجيب الطوارف قنايد
شهير منسبه اطلاق مضمون ***من خيل جيّدات و جوايد
عليه قرم سلاّك الديون ***لا سالن عيون الودايد
يجلّي صماميد الغبون *** نهار البلا والنكايد
كريم ف العطا ما هو منون *** ولا بالصغارة يكايد
من صغره نشا بين واشون *** يجّارى بزين العوايد
وشايب معانيه قانون*** كمال دِين واريا سدايد
رْباة عز مو رْباة ذانون ***اللي كيف عذو اللمايد
اللي ضحكهم ضحك مشنون *** مْواري كبار الغدايد
مناكيد وعْششهم خْنون ***للهايف ان جاهم صدايد
لا يشرحوا بال مكيون *** ولا هم ذرا لا سنايد
كما بين واحد ومليون ***للزينين ما هم ضدايد
اللي بهم العز مقرون *** ف ايّام الرخا والشدايد
هبنهم متاريز وكْلون***جيوش طاليا بالرصايد
ذابوا كما هفو كانون *** ذرّنّه ارياح الصهايد
مشوا عقبوا صيت معلون *** مشهور لسم مو للنشايد
ملاحم الشرف مجد مخزون *** غنن به اوتار وقصايد
حلال البكا عام مطنون *** عليهم برود الحدايد
والصبر خير مرجاه مضمون *** لو طالن عليه المدايد
مجعول للدهر وين ما يخون *** وللجروح كيف الضمايد
كمّين من فتى داه مكمون *** وطارش نقاب الجحايد
الله هو اللي فيده العون *** عارفه سريع النجايد
إن راد شي بالكاف والنون ***يكون بامر ما له ردايد
ورا الزين بالدين مرهون *** والهازلة تهاب الصعايد
ورا لكل تاجر زبون *** واثمان الزهايد زهايد
وراه درب لوناس مامون***وراه الرفق دم زايد
ولا كل من قالوا حرون *** ينقّال له م القعايد
وبو دور بنت طْرشون *** يقولوا اصحاب النقايد
وختام العلل م الفايزون *** إن شا الله نهار الهمايد
على الله ما يخيبن ظنون ***ونْجو من كبار الحصايد
وصلاه ع الشفيع الحنون ***نهار القضا والعدايد
هذه القصيدة الرائعة للشاعر الرويعى الفاخرى
المفضلات