متعب التركي
ماقلت لي شي وشخليت ماقلــــته ** اسكت وخل الكلام لجرحي الــــدامي
لو غيرك اللي يسولف ماتحملـتته ** لاكن على شان عينك هانت الامـــــي
للحب مفهوم عمرك ماتخيلـــــته ** ماظن يستوعبه تفكيرك الســـــامي
هذا الفراق الطويل وهذي اسالته ** وهذا حصاد السنين وهذي ايــــامي
ياما وياما عليك البال طولــته ** والعمر عدا وانا عايش على اوهامي
حتى طريق الفراق اللي تساهلـته ** لقيته اصعب على نفسي من اقــدامي
اصبر لي شوي لو دمي تثاقلـــته ** بحاول استوعب اللي صار قــــدامي
الحب ضحكه بعينك بس ماطلــــته ** عمرك بهالكون شفت ابسط من حــلامي
القلب لو ماخفق لك كان ماشلـته ** ولو منت ملهم قصيدي جفت اقـــلامي
هذا قصيدي بعينك لو تجاهلـــته ** ينزف على شان يروي قلبك الضــامي
العام طاري غيابك ماتقبلــــته ** واليوم حرماني اصبح مصدر الهـامي
لاتعتذر لي وبنسى كل ماقلــــته ** وش ينفع العذر لامن ضاعت ايـــامي
حظي وحرفه
قبل اسافر وتنسى جيت اسلم عليك ** جيت ابي عمري اللي اكتشفته غدا
ضاعت اجمل سنيني من عمايل يديك ** اكذب ان قلت راحت لجل عينك فدا
فرصة العمر قالو لاغدت ماتجــيك ** جتني اكثر فرص عمري وضاعت سـدا
جرب الخوف مره حس به يعتـــريك ** ورفع الصوت ماتسمع لصوتك صــدا
تدري اللي ذبحني قولتك ما ابيك ** مابقالي لثاري لو بغيته مـــدا
ماهقيت المشاعر كلها ترتجـــيك ** قلهم بالمفارق منهو اللي بــدا
هاك دمعة عيون باقيه تشتكـــيك ** هاك ريح ضمير ماستراح وهــــدا
ما تناظر عيوني زول هــذي وذيك ** ما يهز المسامع اسم ريم وهــدا
قلت ماعاد لي رغبه وشوفات فـيك ** قلت يا نفس طيبي يفرحون العـدا
قلت عايف ونفسي بالخفا تشتهـيك ** عزة النفس تدري طيب ماهــي ردا
خل عينك تهل دموعها وش علـــيك ** انت خدك ورود ودمع عينك نـــدا
........................................ ..............................
لا تنشغل فيني انا بحالي ادرى ** قلبن تعلق فيك ينسى مع الــوقت
اكثر من اللي صارلي ويش يجرى ** بين الرجا والياس شفني تعــلقت
هاك القصايد لاتضايقت وقـــرى ** شف وش كثر فيها لضحكاتك اشتـقت
يامشتهي فرقا المواليف حـذرى ** تبعد وانا من سكرة الحب مـافقت
لاطافت الفرصه تحريت الاخـــرى ** وتروح ماكني عليها تشــــــوقت
اثر الوفا ينباع عندك ويشـرى ** ماكنت اصدق فيه واليوم صـــدقت
ساري لو ان الليل مافيه قمرى ** اشيل من حمل الهوى فوق ماطــقت
لاصار حظ اقشر والايام قشـــرى ** مافيه احد عاقل يلومك اليا ضقت
صحيح بعض الناس فرقاه بشــرى ** وبعض البشر لاغاب ليله تضايــقت
ليتك خذيت بليل الافكار مسـرى ** غربت من كثر الطواري وشــــرقت
السيل يبقاله من القاع مجـرى ** ويبقالك التذكار لو كنت فـارقت
اشوفلك من وين مارحت ذكـــرى ** لاشفتها صديت عنها ودنـــــــقت
ماكل جرح لاخذا ايام يبــــرى ** بعض الجروح يزيد شره مع الـوقت
........................................ ..................
زي لون الطيف والوان الفـراش ** الهنوف اللي شغلني صــدها
ان بكت جا دمعها مثل الرشـاش ** وان تبسم ثقرها من قــدها
وان حكت كن بشفايفها رعـــاش ** الخجل عن سالفتها لـــدها
والطيور اللي جفت حضن العشاش ** ليتها خلت بقايــــا ودها
عقبها كل الغصون امست نشــاش ** خاليه عقب الوناسه خــدها
كل قلبن في ذراه الحب عـــاش ** فيه طيبه زايده عن حــدها
والقلوب ان فارقت صارت هشـاش ** موحشه والذكريات تشـــدها
رفرف البرق وزمت بيض الدشـاش ** ومتلا من صافي الما عــدها
مابنيت بيوت شعري من قشـــاش ** ليه اخاف ان الرياح تهدها
والهجوس اللي من الفرقا عطاش ** ترغب نجوم السما وتعــدها
يوم شق النور من ليل القمـاش ** شفت حبة خالها في خـــدها
القصيد لمثلها ولا بـــــــلاش ** لو تبي عمري حشى مــاردها
........................................ .....................
اخر اللي سمعته في نهار الــوداع ** دقة القلب مدري صوت عجل الخطــاوي
نايف الطول وش سوى بي الا نقــطاع ** صار بين ضلوع القلب كنه يــــداوي
بيني وبين ضحكات السعاده نـــزاع ** كني اللي قضى عمره طريد جـــــلاوي
امتلي غيض وازعل يوم ورجع بســاع ** راعي الجرح يستحمل عذاب المــداوي
وش يفيدك عذابي ياغريب الطبـــاع ** ليه دايم على الملتاع سيلك نحـاوي
غالطوني وقالو ليش هالا نــــدفاع ** ازعجوني عليك مفسرين الحكـــــاوي
عذربوك بوجودي بالجفا والخـــداع ** فيك حلو الوصايف فسروها مســــاوي
التزمت السكوت ورايهم فيك ضـــاع ** لين قالو ترى متعب على البعد ناوي
ميت القلب عرضت الغلا للضيـــــاع ** والله اني على قطع الرجا بك مراوي
ماتغيرت لين انك لويت الــــذراع ** تحسب اني على الهجران ماني بقـاوي
لو تقول انت ماعقب الفراق اجتماع ** عندي اليوم كل اللي تقول متســاوي
او يقولون صار يخاف قلب الشجــاع ** من هاك الليله وبيت القصيد متهاوي
بين شقر الجدايل والعيون الوسـاع ** اذكر اني فقدت القلب في هالحـراوي
المفضلات