العين شفت الحيف والعدل مرفوع
وبدأ يغيب النور عقب أنبلاجه
وأبعد علينا العدل عن حبة الكوع
وصار الخطر في راكبين الحداجه
وعن الوطا غيث السما صار ممنوعن
الله يعجل لامته بأنفراجه
قولوا لأبوفيصل ترى الشر مزروع
ويصعب عليه ليا تعظم علاجه
لايترك الدنيا بلا شبوح وطلوع
نخاف من سيل يزيد أرتهاجه
لازم يحط الحبل مثني ومربوع
ويخط درب مايجي به عواجه
والقصر لو أنه من الصلب مصنوع
أن عاب ساسه ماتفيدك أبراجه
والراس مايفزع ليا صار مقطوع
وللحي ماقالوا شف الميت ناجه
والبيض مالبسن من الطاس ودروع
والصبح بين ينعرف بأنفجاجه
ولا حي الا يعرف الشبع والجوع
ونفسه لها في كل الأيام حاجه
أشوف ناس زادوا الخبت بطبوع
والكل منهم صار يرفع حجاجه
ماجربوا غارات طامع ومطموع
ولا دوجوا بالحرب يوم المواجه
في ساعة فيها الصعب يهتدي طوع
لاصار لفواه المدافع لجاجه
كم واحد في ماقف الطيب مشلوع
ينقص مقامه عقب فعل السماجه
وكم واحد يصعد للأفلاك بطلوع
يعز من حديد الصلب ذابه وعاجه
لقيت ناس مالقي لهلها قوع
وشفنا الفهد والذيب يتلى نعاجه
عزاه ياقلب معذب وملقوع
خيل عليه وضاقت به أفجاجه
ناس على نوع وقلبي على نوع
وبيني وبين الناس مثل الزراجه
قلبي صعب حرف الوفا فيه مطبوع
لاشك في ربعه يشوف الحراجه
فيما نشوف بناظر العين مفجوع
وللطيب والله هزته وأبتهاجه
المفضلات