لاشك ماني لاتضايقت بلشان
أنقى الجزايل وأهتوي للمعاني
أقطف زهر وأختار من كل بستان
وأقدمه لأهل المعرفه بياني
أمثال في جوفي تصافق لها شان
عندي حللها والحقيقه ضماني
ياكنها خيل السناعيس يافلان
أو خيل الأسلم في قديم الزماني
أو خيل سجاره لها الوقت برهان
بأيمانهم صنع الهنود السناني
عسفتهن وأنا على القاف شفقان
وأسرجتهن في روسهن العناني
أو كنهن جيشٍ مواريث شجعان
ياما حلا فديدهن بروجاني
عيرات منقيات في وسمهن بان
المشط والمطرق حرار همزاني
طفقات لاطبن على كل ميدان
فنس الخشوم معكفات الأذاني
ماكل وصفي لكن أحيان وأحيان
أسج وأدله من مكان لمكاني
أبدع وأعبر ماجرالي وماكان
إليامن هاجوس الضماير دعاني
أشوف لي ناس قريبين وأخوان
تغيرن طبوعهم للجناني
تاقف لهم عند اللوازم بليهان
وقفت عزيزٍ مارضي للهواني
ماترجي ألا من هكالطيب عرفان
كلمة شكر ماغيرها باللساني
وأثر النتيجه بآخر الوقت قطعان
ياحيف راحت هالزمان المجاني
ليه الردا يامارثة غيم هتان
الله يقطع نظرةٍ للطماني
أحسن وتلقى بالحيا رد الإحسان
مار الزمن غر العقول الذهاني
أن لنت بالجانب حشيمه لخلان
جو يدحمونك بالجنوب المتاني
وأن طبتك من طيبك معزة كحيلان
تلقى الجزا تالي الزمان نسياني
ألا العزاز اللي لهم بالوفا شان
أهل النفوس اللي نباهم خذاني
الرجل لو دار الزمن يوم مالان
يزيده الوقت الردي بالتفاني
والحكي ماضّيع صحيحين الأذهان
دام المبادي حاضره بالثواني
وإن كنت من كلمه مشيّح وحيران
أرفع مقامك للعلا دوم عاني
وأعرف ترى من جنّب الناس ربحان
وأكتم همومك بالضلوع المحاني
حتى أيش لو أنك من الوقت طفشان
أصبر مدامك للعنا ماتداني
وأن كان حضك شابهه طير برمان
هذا الرزق مقسوم والعمر فاني
ودام الزمن حد الذيابه على الضان
باكر تشوف من الغبن علم ثاني
المفضلات